Sonda, als 7 d’october
a las 17:30, Casa Torre
Carin Caduff en dialog cun Claudio Spescha
(RM/IT)
Carin Caduff (* 1988) è creschida si a Vattiz en Val Lumnezia e viva oz sper il Lai da Turitg. Suenter in’emprima furmaziun commerziala ha ella sa perfecziunada tar la Scola auta da Pedagogia soziala da Dornach, ed ha absolvì in curs da scrittira litterara tar la Volkshochschule Zürich. En il rom da sia lavura actuala sco pedagoga sociala propona ella regularmain lavuratoris da scriver per glieud cun impediments. Dapi 2021 publitgescha Carin Caduff poesias e prosas per sursilvan. Ella scriva columnas per La Quotidiana, collavurescha cun la revista Litteratura da l’Uniun per la litteratura rumantscha (ULR) e cun RTR per l’emissiun litterara Impuls. Dal 2022 è cumparì Furt e naven! (Chasa editura rumantscha), ses emprim cudesch cun raquints curts en in register colloquial. Dal 2023 èn ses texts litterars vegnids publitgads, ensemen cun la translaziun franzosa, en la pitschna antologia 5 idioms 5 dunnas, tgirada da Denise Mützenberg (ed. Les Troglodytes).
Claudio Spescha (*1971) ha studegià linguas e litteraturas romanas e publicistica a Turitg e Montpellier. Dapi 2014, suenter in decenni sco redactur tar Radiotelevisiun Svizra rumantscha RTR, è el redactur tar la Televisiun svizra da lingua tudestga SRF, actualmain sco correspundent per il Grischun a Cuira e sco moderatur da Tagesschau a Turitg. Durant plirs onns ha el co-organisà ils Dis da litteratura da Domat. El sa fatschenta cun translaziun litterara ed ha translatà per tudestg, tranter auter, il raquint Cavrein (2014) ed insaquantas istorgias curtas da la rimnada Auf der Suche nach dem verlorenen Schnee (2016), da Leo Tuor, ed insaquants raquints e poesias da Göri Klainguti e Theo Candinas. Sco autur ha Spescha inizià ina retscha da formats radiofonics satirics per la seria ch’el ha sez sviluppà, Egl ascensur dalla Porta alpina. Ultra da quai ha el publitgà texts da prosa, columnas e poesias per sursilvan, suvent inspirà dal gener «spoken word».