Inscunter deditgà als uffants, preschentà da la Lia Rumantscha: La maschina da furtüna da Herr Widerstand
Spectacul per uffants in pliras linguas, da e cun Annina Sedlacek e Nikolas Stocker
(RM/DE/IT)
Sar Widerstand e la maschina da furtüna. Sar Widerstand, ün scienzà instancabel e caotic, ha l’idea geniala da construir üna maschina chi fa gnir cuntaint. La maschina da furtüna! Es quai sia schanza per survgnir il premi Nobel? Sia assistenta Betta sustegna daspö ons vivamaing sias invenziuns. Pero plan a plan cumparan obstaculs e resistenzas. Co cumanzar? Che porta furtüna? E che far lura culla furtüna? Lur proget vegn adüna plü disfurtünà. Tuots duos as perdan vieplü in lur dramas fin chi piglian cun amur lur aigna furtüna in man. Ün spectacul umoristic da la retschercha da furtüna per uffants da 5 fin 99 ons per rumantsch, talian e tudais-ch.
Da e cun: Annina Sedlacek und Nikolas Stocker
Redschia: Brita Kleindienst
Producziun: Cie. Aniko
Coproducziun: Lia Rumantscha
L’actura, reschissura, coach, pedagoga da teater Annina Sedlacek è naschida dal 1980 a Sent, nua ch’ella è creschida si. Suenter in diplom a la scola da ritmica Institut Jacques Dalcroze absolva ella ina furmaziun da teater a la Scuola Teatro Dimitri. Dapi 2004 lavura ella sco actura independenta, reschissura e pedagoga da teater. Ella è commembra da pliras gruppas teatralas en Spagna, Italia, Germania e Svizra. Durant l’onn dirigia ella pliras reschias e dat scola da teater en plirs lieus. Ella ha survegnì plirs premis e fa da coach tranter auter per ils uffants acturs protagonists dals films Schellenursli e Papa Moll. Dal 2018 ha ella fundà l’ANIKO Theater, ensemen cun Nikolas Stocker.
L’actur, clown, reschissur, pedagog da teater e da circus Nikolas Stocker è naschì dal 1985 a Zug. Suenter ina carriera sportiva cun titels sco champiun svizzer da judo e champiun dal mund d’airboard, sa furma el sco scrinari. Dal 2014 absolva el la Schule für Clowns, Komik und Comedy. El funda sia atgna cumpagnia Amlou ed ha ses debut dal 2016 cun il toc Nach Eden. Dapi lura lavura el sco reschissur, gioga el cun pliras troupes e sco pedagog da teater e da circus. El fa ussa in Master a l’Accademia Teatro Dimitri en teater d’objects.
