Performance musicala da e cun Melinda Nadj Abonji e Simone Keller
Lecturas scenicas dad Olimpia De Girolamo e Massimiliano Zampetti
Cun Melinda Nadj Abonji e Simone Keller cumparan duas artistas enconuschentas a nivel internaziunal, che han blera affinitad per lur art respectiv. L’autura Melinda Nadj Abonji, che ha survegnì il Schweizer Buchpreis ed il Deutscher Buchpreis per ses cudesch Tauben fliegen auf, ha gugent la musica ed è in’excellenta chantadura. La pianista Simone Keller, che ha dacurt survegnì il Premi svizzer da musica, s’interessescha a la litteratura, cumpara sin bleras scenas da teater, la davosa giada al sogar Theater cun il toc Extensions. Ellas han collavurà per l’emprima giada per il festival unerhört! 2019. Al center da quel program eran ils texts brigliants da Rosa Luxemburg e la musica energica da la cumponista russa Galina Ustwolskaja. Melinda Nadj Abonji e Simone Keller avran Lettere dalla Svizzera alla Valposchiavo cun ina poesia da Hilde Domin e musica da bellezza, cumponida per questa occurrenza. As laschai surprender!
Melinda Nadj Abonji è naschida a Bečej, en Serbia, dal 1968 ed è arrivada en Svizra dal 1973. Ella ha absolvì in studi da germanistica a Turitg dal 1997. Ella ha survegnì il Buchpreis tudestg e svizzer per ses segund roman, Tauben fliegen auf (Jung und Jung, 2010), ed il ZKB Schillerpreis per il suandant, Schildkrötensoldat (Suhrkamp, 2017). Ella lavura sco autura e performer e viva a Turitg.
La pianista classica Simone Keller (*1980) sa mova tranter divers stils e geners, tschertga l’experimental ed è attenta a la tradiziun. Ella stgaffescha lioms, cunzunt cun s’engaschar ferm per in access pli grond a la musica en la societad. Sia activitad da concertista ha lieu en instituziuns internaziunalas da renum sco en lieus pli marginals e da nischa, nua ch’ella s’avischina adina puspè al nov ed al nunusità.
Olimpia De Girolamo è naschida a Napoli als 6 da settember da 1975. Il matg da 1999 vegn ella licenziada en Filosofia a l’Università degli Studi di Napoli Federico II e lura sa spezialisescha ella en linguatgs cinematografics ed absolva in Master en pedagogia e didactica teatrala. Ella viva en Svizra dapi 2002, nua ch’ella dat scola da talian e sa fatschenta cun teater sco autura, actura e furmatura. Ella è co-directura artistica da l’Agorà Teatro da Magliaso, in spazi da perscrutaziun e da furmaziun bajegià dal 2005 en l’iert da sia atgna chasa. Cun il monolog La Mar ha ella guadagnà il Premi Fersen (Milan) ed è stada finalista dal Premi Donne e Teatro (Roma). Dal 2021 ha ella guadagnà il Premi Opennet da la Sentupada Litterara a Soloturn cun il raquint Il primo scalino: l’assalto del passato che daventa lura il roman Tutto ciò che siamo stati, edità da Gabriele Capelli Editore il matg 2022.
Massimiliano Zampetti è actur, sincronisatur, speaker e reschissur. El ha creà pli che trenta spectaculs. El ha collavurà cun bleras instituziuns, tranter quellas: Teatro d’Emergenza, LAC Lugano, Teatro Sociale di Bellinzona, RSI radio e televisione. Cun Radix Svizzera italiana sviluppescha el spectaculs interactivs en las scolas per prevegnir las dependenzas. Dacurt ha el creà l’associaziun Ex/Novo per facilitar la collavuraziun tranter las diversas instituziuns artisticas en il Tessin.