Il tema da l’ediziun da 2024 da Lettere dalla Svizzera alla Valposchiavo è In, dus, trais… E dai!

In tema che maina enavos a l’uffanza, als gieus, nua che la gruppa è essenziala e nua che la disciplina ed il plaschair vegnan ensemen. Cur ch’ins gioga – In, dus, trais… E dai! – van ins ensemen vers ina finamira cuminaivla, mintgin e mintgina cun sia atgna strategia, tras muments da star salda e muments da sa mover spert u plaun. La strategia che gudogna n’è betg adina la medema, las cundiziuns da mintga gieu determineschan tge che funcziuna e tge che na funcziuna betg. Sco en la vita e sco en la litteratura.

En la litteratura sco en il gieu che dat il num al festival da 2024 midan las strategias e midan ils resultats. Giugar è ina questiun seriusa, er cur ch’i sa tracta da la lavur solitara da scriver. Cun questa tematica less il festival onurar las quatter linguas naziunalas, sco en tschellas ediziuns, ma er las diversas scrittiras ed il gieu che sa zuppa davos mintgina dad ellas. Tuttas van encunter ils medems puncts: quintar da sasez e dal mund e sa scuntrar cun il lectorat. Lettere dalla Svizzera alla Valposchiavo less puspè dar ina vusch a questas narraziuns ed a questa scuntrada.