Dumengia als 5 d’october
A las 11:30, Casa Torre
Ruth Gantert preschenta il numer 19 da la revista Viceversa Litteratura.
Dialog e prelecziuns cun Ralph Tharayil e Mariann Bühler.
(DE / IT)
Ralph Tharayil, figl da geniturs oriunds da l’India dal Sid e creschì si a Liestal, ha studegià istorgia, communicaziun e litteratura a Basilea. El lavura cun texts a l’interfatscha da la litteratura, dal teater e da l’audio. Il 2023 è cumparì ses debut litterar Nimm die Alpen weg, ch’è vegnì undrà cun il Premi Terra Nova da la Fundaziun Schiller Svizra e da l’Alfred Döblin-Medaille. Il settember 2024 ha gì lieu la premiera scenica dal cudesch a Bühnen Bern, nua che Ralph è autur en residenza durant la stagiun 24/25. Ses toc, ch’è ina transcripziun dal Cudesch da la dschungla, vegn lura là sin il palc il schaner 2026. Ensemen cun Ivna Žic ed Henri-Michel Yéré ha el tgirà e moderà la seria da dialogs Second Thoughts – weil die Welt nicht so bleiben kann wie sie wird a la Chasa da la Litteratura da Basilea. Ralph è commember dal collectiv d’artist:as parallelgesellschaft. El viva a Berlin.
Mariann Bühler (*1982 en Svizra Centrala) è autura, mediatura litterara e participescha sco organisatura en divers contexts. Ses emprim roman «Verschiebung im Gestein» (Atlantis Literaturverlag) è vegnì nominà per il Schweizer Buchpreis il 2024. Per sia creaziun litterara ha ella survegnì ina contribuziun da la Cumissiun d’experts da litteratura da la regiun da Basilea (2018) e da la Promoziun litterara da la Svizra Centrala (2020). Ella viva dapi ditg a Basilea. Mariann Bühler ha inizià e manà il project Sofalesungen ed ha collavurà tranter auter cun las Chasas da la Litteratura da Svizra Centrala e da Basilea. Ella è coeditura dal volum «Reihenweise. Veranstalten in der Freien Literaturszene» (edition mosaik, 2022). Ella ha studegià litteratura e linguistica englaisa, scienzas da l’islam e gender studies a l’Universitad da Basilea ed a la Freie Universität Berlin ed ha survegnì il diplom il 2010.
Ruth Gantert è translatura dal franzos, dal talian e dal rumantsch. Tranter sias davosas translaziuns chattain nus «Peter und so weiter», d’Alexandre Lecoultre (Der gesunde Menschenversand), «Aus gleichem Holz», da Marion Fayolle (Atlantis), «Gloria. Mohammed», d’Isabelle Flükiger (Rotpunktverlag) e l’antologia «Amur» tgirada dad Annetta Ganzoni e Bettina Vital (Chasa Editura Rumantscha). Enfin avust 2025 è ella stada coordinatura dal project «Viceversa» e responsabla da l’ediziun tudestga da la revista e da la website trilingua viceversaletteratura.ch. Redactura e mediatura culturala, ella è secretaria generala da la Fondazione Casa Atelier di Bedigliora.